麥巴比排第9即場黑面　暗示離隊追金球夢

最強博彩盤路過關神器《串績王》：http://win.on.cc/football/　

金球獎只係得一個，贏家亦只有美斯一人，當C朗拿度跌到落第6位、羅拔利雲度夫斯再次錯過拎金球獎嘅最佳機會，今個頒獎禮最「不爽」嘅人似乎係基利安麥巴比！雖然冇人預期呢位法國前鋒可以得獎，但當佢聽到自己只係排第9位，即場流露不悅神情，「黑面」鏡頭亦被網民瘋傳。

基利安麥巴比喺2021年有45個入波同20次助攻，亦協助法國贏得歐國聯冠軍，佢喺對上3屆金球獎分別排第4位、第7位同第6位，但係今次公布第9位讀出佢個名後，坐喺身邊嘅美斯同蘇亞雷斯都有送上祝賀，但基利安麥巴比就出現不悅神情，只係勉為其難咁拍手，氣氛古怪。

基利安麥巴比之後都收拾心情，佢負責頒發女子金球獎前，都話自己無法同美斯、C朗相比。不過呢位前鋒接受《隊報》訪問，就透露贏金球獎嘅計劃：「我嘅目標當然係想贏得1次或者多次金球獎，但呢個需要一個過程，我認為自己行緊正確嘅道路。」媒體認為麥巴比嘅「過程論」，係暗示會離開巴黎聖日耳門尋求更上一層樓。