咩話！20比0！英格蘭女足瘋狂大勝

足球博彩神器，每日重心提供盡在《彩報》：http://win.on.cc/football/　

一場比賽得90分鐘，20比0係咩玩法？周三(1日)凌晨女子世界盃歐洲區外圍賽，實力超班嘅英格蘭主場對拉脫維亞，毫無憐憫咁狂炒對手20蛋，全隊一共有10個球員入波，其中3個上演「帽子戲法」，另一個食出「大四喜」，真係人人有份永不落空。

呢場D組賽事本來就預計會係大屠殺，首循環英格蘭女足作客已贏10比0，不過今仗返主場完全冇諗住留下力，3、6、9、12、18唔係六合彩搞珠，而係英格蘭女足頭5個入波嘅時間，半場就領先8比0，換邊後繼續踩油狂攻，連埋最後10分鐘入嘅5球，最終贏20比0創下球隊史上最大勝仗紀錄，遠遠超出2005年創下嘅13比0舊紀錄。

事實上，歐洲女子足球嘅發展極唔平衡，今屆世盃外就出現大量離奇賽果，同日(1日)愛爾蘭就以11比0贏格魯吉亞，比利時上星期就主場19比0大勝阿美尼亞，今屆世盃外歐洲區已有11場比賽出現雙位數狂勝賽果。英格蘭目前喺D組6戰全勝，入53球而未失過1球。