硬漢變潺仔　拉莫斯踢1場又受傷

最強博彩盤路過關神器《串績王》：http://win.on.cc/football/　

西班牙後衞沙治奧拉莫斯上周終於傷愈復出，首次為巴黎聖日耳門(PSG)上陣對聖伊天，點知好景不常，呢位35歲老將又受傷，唔止缺陣周中法甲對尼斯，亦無法喺周日(5日)凌晨聯賽上陣對朗斯。

沙治奧拉莫斯今夏以自由身從皇馬轉投PSG，但簽約之後，就因為小腿受傷，缺陣5個月，直至早前對聖伊天，先至復出，並踢足全場。可惜沙治奧拉莫斯踢完1場波之後又受傷，將會接受特別康復訓練，未知幾時可以再披甲。

一向以踢法硬朗見稱嘅沙治奧拉莫斯近年備受傷患困擾，今年只係踢過8場比賽，包括為皇馬上陣5場，為西班牙國家隊上陣2次，以及為PSG踢過1場。據悉，PSG教練普捷天奴仍然非常支持沙治奧拉莫斯，希望佢再次為球隊比賽，但球迷未必對佢咁有耐性。