巴西傳奇門將加盟　艾利臣同偶像拍住上

最強博彩盤路過關神器《串績王》：http://win.on.cc/football/　

利物浦上星期宣布獲巴西傳奇門將泰法路加盟，出任球會門將教練一職，成為「紅軍」第3個龍門教練。利物浦領隊高普透露，有呢個行動全因艾利臣比加同泰法路嘅密切關係，而泰法路將會負責協助利物浦建立一套「龍門哲學」。

55歲嘅泰法路代表巴西國家隊上陣超過100次，亦係94年世界盃冠軍功臣，近年都喺巴西國家隊工作，訓練艾利臣比加同艾達臣摩拉斯等頂級龍門，今次兼職教埋利物浦，高普就話：「我哋有呢個諗法已經好耐，同艾利臣傾過之後佢非常讚成，泰法路亦都樂意加盟，佢喺巴西訓練過大量好龍門，最重要係佢年紀大過我，我已經唔係教練團入面最老嗰個！」

高普之後認真解釋：「利物浦各梯隊都有好多出色門將，所以我哋希望幫助每一個球員，並且建立出利物浦嘅龍門哲學。」艾利臣今個夏天同利物浦續約6年，相信未來一段長時間都會係利物浦No.1，佢過去就曾經表示，細細個視泰法路同保方為偶像，依家有機會同偶像喺球會合作，相信表現可以更上層樓。