薩爾斯堡新星勁寸　拒絕巴塞招攬

最強博彩盤路過關神器《串績王》：http://win.on.cc/football/　

薩爾斯堡新星艾迪耶美今季表現大熟大勇，喺今季各項賽事上陣18場入14球，包括歐聯5次上陣入3球，被譽為「新夏蘭特」，巴塞隆拿率先出手，計劃簽入呢位19歲前鋒。不過，根據德國傳媒爆料，艾迪耶美已經拒絕巴塞邀請，因為佢想返回德國搵食。

艾迪耶美曾於拜仁慕尼黑青年軍受訓，今年已經晉身德國大國腳，佢最想衣錦榮歸，加盟德甲球隊。據悉，艾迪耶美希望仿傚前薩爾斯堡射手艾寧夏蘭特，轉投多蒙特，等自己喺頂級聯賽站穩陣腳後，再考慮是否加盟大球會。

與此同時，艾迪耶美為自己定下目標，就係以正選身份為德國出戰2024年歐國盃決賽周，效力德甲球隊，有利佢爭奪國家隊正選位置，所以唔會考慮巴塞隆拿等其他外國球隊。

薩爾斯堡將於周四(9日)凌晨歐聯G組主場對西維爾，兩隊最多只能活一隊，就睇下艾迪耶美能否協助薩爾斯堡出線。