曼聯用年青人和年青人 沙維治首演整喊老竇

2021年12月09日 14:00
東網電視
更多新聞短片
最強博彩盤路過關神器《串績王》:http://win.on.cc/football/ 
周四(9日)凌晨歐聯分組賽F組,已篤定晉級嘅曼聯喺起用大批「年青人」嘅情況下,主場被瑞士球會年青人逼和1比1。「紅魔鬼」新帥蘭歷克今場用咗6個19歲或以下球員,當中首演嘅查理沙維治最受注目,佢爸爸係前曼聯青訓兼威爾斯名將沙維治,依家擔任電視台評述嘅沙維治講到囝囝登場嗰刻,幾乎感動到喊出嚟。
曼聯今場大幅輪換,雲迪碧克、連格、甸恩軒達臣等後備都正選披甲,尼曼查馬迪亦要客串中堅,前鋒就由20歲嘅格連活特,帶住兩個19個小將阿密特迪亞路同艾蘭加攻堅,開波9分鐘就由格連活特入波先開紀錄,但42分鐘被年青人追平。下半場曼聯再換入19歲嘅文治、18歲嘅伊巴爾、17歲嘅梳泰亞同18歲嘅查理沙維治,最終兩隊踢成1比1平手。
查理沙維治喺89分鐘入替成為焦點,佢爸爸沙維治係曼聯青訓出身,雖然未幫一隊上陣就離隊,但效力李斯特城、布力般流浪等球會都有唔錯成就。今場擔任電視台評述嘅沙維治,見到囝囝入場時表示:「查理沙維治入替桑馬達!我從來冇諗過會講呢段說話,呢日係好光榮嘅日子,查理入替一個世界冠軍......諗到查理年紀輕輕就有呢個成就,我真係好想喊!」