激到爆！英超法甲齊出現補時反勝絕殺

最強博彩盤路過關神器《串績王》：http://win.on.cc/football/　

周六(11日)凌晨英超、法甲不約而同出現補時反勝絕殺嘅戲劇性賽果，其中英超「福特大戰」，賓福特上半場落後之下，踢到比賽末段連入2球，包括補時5分鐘獲得12碼，主場以2比1反勝屈福特。

作客嘅屈福特上半場24分鐘，由前鋒艾曼紐丹尼斯頭槌頂入，先開紀錄，賓福特傾力反擊，但要等到84分鐘，先至由中堅邦圖斯贊臣頂入成1比1，踢到補時5分鐘，後備上陣嘅賓福特前鋒沙文高度斯喺禁區內被對手侵犯，球證吹罰12碼，麥比奧莫主射入網，協助賓福特反勝2比1，取得重要3分，反觀屈福特遭遇4連敗，受降班威脅。

至於法甲南特主場對朗斯，戰況更加峰迴路轉，朗斯開賽14分鐘，已經由大衞哥斯達、卡利穆恩度各建一功，領先2比0。換邊之後，南特迅速由中場高路梅安尼射入2球扳平，並喺補時由後備上陣嘅摩西斯西蒙攻入致勝1球，完成大逆轉贏波。