疫情失控!英超英冠連環取消 曼聯復操再爆發

20211216
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
英超疫情問題逐漸失控,多間球會出現爆發令多場英超、英冠賽事延期,周四(16日)凌晨般尼對屈福特一仗喺開波前3個鐘突然取消,另外今個周末英冠亦有3場賽事宣告延期,據報李斯特城同曼聯亦出現再爆發問題,「紅魔鬼」訓練場解封後首次操練,即刻再有2名球員確診,周六(18日)對白禮頓嘅聯賽盛傳亦會取消。
般尼對屈福特嘅賽事開波前唔夠3個鐘,英格蘭足總宣布因屈福特賽前檢測出現多人確診,臨時決定取消,亦係過去1個星期內第3場延期嘅英超賽事。英冠方面同樣立立亂,繼錫菲聯對昆士柏流浪後,周六3場聯賽(米禾爾對普雷斯頓、昆士柏流浪對史雲斯、雷丁對盧頓)已率先延期,英超、英冠亦有多場賽事等待比賽決定。
曼聯係英超其中一間受疫情打擊最嚴重球隊,據報球隊早前有19名球員同職員確診,令卡寧頓訓練基地亦要關閉24小時消毒,不過當訓練場重開後,復操前嘅檢測再有2名球員確診。據報曼聯方面正對足總商討,可能會取消周六主場對白禮頓嘅聯賽。
除咗曼聯之外,熱刺、李斯特城、屈福特、白禮頓等球會近期都有較大規模嘅疫情爆發,賓福特、阿士東維拉、車路士等亦有零星確診個案,原本英超賽程最密集嘅聖誕及新年快車,依家面臨崩潰危機。