59場入69球　羅拔佬追平C朗單年入波紀錄

最強博彩盤路過關神器《串績王》：http://win.on.cc/football/　

周六(18日)凌晨德甲，榜首拜仁慕尼黑主場以4比0大勝禾夫斯堡，以冬季盟主身份進入歇冬期，結束今年賽事。拜仁前鋒羅拔利雲度夫斯基今場又射入1球，佢喺2021年各項賽上陣59場，轟入69球，追平C朗2013年做出嘅單年最多入波數字，但同美斯2012年創出嘅91球單年最多入波紀錄，仍然有一段距離。

拜仁今場開波7分鐘就領先，基拿比遠射被禾夫斯堡門將卡斯迪爾斯撲出，湯馬士梅拿補射入網。換邊之後，湯馬士梅拿傳畀烏柏美卡奴頂入成2比0。

僅過2分鐘，利萊辛尼射入世界波，加上臨完場前，羅拔利雲度夫斯基凌空射入，拜仁大勝4比0，領先踢少1場嘅第2位多蒙特9分。

羅拔利雲度夫斯基今年各項賽事上陣59場，其中45場有波入，包括14場梅開二度、5場帽子戲法，累計轟入69球，同C朗2013年入球數字睇齊，值得一提2人同樣踢59場，達到呢個入波數字。