曼聯險勝維拉晉級 VAR爭議判決救命

2022年01月11日 08:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周二(11日)凌晨英足盃第3圈最後一場賽事,曼聯主場1比0險勝阿士東維拉晉級,下一圈將會對主場住米杜士堡。曼聯今場贏得驚險,全場只有43%控球率,要靠迪基亞神救加上VAR爭議判決救命,領隊蘭歷克承認球隊仲有好大進步空間。
蘭歷克今場放棄發揮唔好嘅4-2-2-2陣式,用番之前嘅4-2-3-1,C朗拿度有輕傷被收起,開波8分鐘就收到效果,費特右路傳中畀中場拍擋麥湯米尼頭槌頂入。不過曼聯領先之後形勢轉弱,維拉嘅進攻拳拳到肉,包括奧尼屈堅斯乘域陀連迪路夫控球失誤,偷波殺入禁區勁射中楣。
換邊後維拉繼續狂攻,50分鐘丹尼艾格斯曾近門將個波送入網,但VAR經過長達3分半鐘嘅審查後,球證奧利華將入球作廢,最初以為係越位問題,但原來奧利華係罰積及藍斯喺遠離入波現場嘅位置阻擋卡雲尼,最終曼聯堅守1比0勝果至完場。
維拉領隊謝拉特賽後不滿表示:「我聽到幾個唔同嘅詐胡原因,旁證話係積及藍斯阻人,如果咁簡單點解要睇3分半鐘?當時我哋氣勢非常好,呢次長時間停頓打斷咗我哋嘅節奏。」英格蘭名宿舒利亞亦話:「我唔肯定卡雲尼係回防,就算真係有犯規動作,呢個都唔係明顯誤判。」
至於曼聯領隊蘭歷克就集中講球隊表示:「經過輸畀狼隊之後,球員今場交出好好嘅反應,不失球係非常重要。如果我話呢場波係完美當然冇人信,球隊仲有好多地方需要改善,但喺贏波嘅情況下一切都容易得多。」