熱刺1月散貨　干地掃走3大球星

最強博彩盤路過關神器《串績王》：http://win.on.cc/football/　

熱刺聘請干地執教後成績提升，不過隊中仍然有唔少「瘀血」，據英國《天空體育》報道，尼當比利、貝雲積同迪利阿里都被掛牌，有機會喺今個月被干地清走，其中阿積士收購荷蘭翼鋒貝雲積非常積極，雙方正就轉會費議價，有望成事。

24歲嘅貝雲積2020年加盟熱刺，但表現令人失望，今季只踢過310分鐘聯賽，干地已下令將佢賣走，據報阿積士首次開價1,500萬鎊被拒絕，不過該荷蘭勁旅總監奧華馬斯仍然同熱刺商討，估計阿積士會提高開價促成轉會。

至於法國中場尼當比利，上場英足盃對摩甘比正選上陣，但面對英甲對手都踢到荒失失，結果喺自己球迷狂噓下被換走，並且直接走番更衣室，消息指呢位法國中場已下定決心離隊，問題係冇其他球會願意出價買人，而佢20萬鎊周薪亦令外借難度增加。除尼當比利外，另一中場迪利阿里亦唔喺干地計劃之內，消息指熱刺正同多間球會推銷呢位前英格蘭國腳。