古天奴亮相維拉 下一個到蘇亞雷斯?

2022年01月12日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
英超球會阿士東維拉上年11月聘請謝拉特執教後,唔單止成績明顯改善,轉會市場上亦雄心勃勃。菲臘比古天奴日前落實外借維拉後,周三(12日)正式喺新球會亮相,呢位巴西國腳表明重返英超全因謝拉特,據報謝拉特更密謀再打昔日利物浦隊友主意,準備夏天邀請自由身嘅蘇亞雷斯加盟!
29歲嘅古天奴由巴塞隆拿外借維拉,周三完成體測簽約後正式亮相,將會著起23號波衫,周日(16日)凌晨英超主場對曼聯可以候命。古天奴接受維拉官網訪問話:「好開心可以加盟維拉,我同謝拉特識咗好耐,做過隊友,喺佢身上學到好多,我非常仰慕謝拉特,會盡力為佢效命。」
為《Talksport》任主持嘅前英超球星艾邦拉荷爆料,謝拉特有意再搵昔日「紅軍」戰友加盟,烏拉圭前鋒蘇亞雷斯就係目標,佢同馬德里體育會合約季尾完結,謝拉特可以邀請佢以自由身加盟,艾邦拉荷表示:「喺古天奴加盟後我同謝拉特傾過轉會,佢用4個字答我『到下一個』。」
13/14球季利物浦幾乎奪得英超冠軍,當季謝拉特、蘇亞雷斯同古天奴「鐵三角」組合表現突出,蘇亞雷斯更視謝拉特為「哥哥」,相信謝拉特出手嘅話,對蘇亞雷斯會係極大吸引力。另外,維拉正同愛華頓斟介收購左閘盧卡斯迪治尼,再次證明維拉嘅雄心。