紐卡素以本傷人　癲價「買斷」護級對手主力

足球博彩神器，每日重心提供盡在《彩報》：http://win.on.cc/football/　

獲沙特阿拉伯財團入主嘅紐卡素，為護級不惜以本傷人，據英國各大媒體報道，「喜鵲」已經成功物色新前鋒加盟，不過主角唔係之前傳過嘅奧巴美揚、奧士文尼迪比利、安東尼馬迪爾等球星，而係啟動般尼前鋒基斯活特嘅「買斷條款」，用2,500萬鎊「癲價」收購呢位30歲前鋒，直接削弱護級對手嘅實力！

紐卡素前鋒卡林威爾遜受傷要抖2個月，買前鋒成為領隊艾迪侯域首要任務，當全世界以為「喜鵲」會物色星級前鋒，佢哋就選擇簽般尼前鋒基斯活特，呢位30歲嘅新西蘭國腳合約中有2,500萬鎊買斷條款，意味般尼冇權阻止紐卡素搶人，消息指基斯活特已經飛去紐卡素做體測，完成後會正式簽約。

排尾2嘅紐卡素目前同尾3嘅般尼同分，而基斯活特喺般尼今季17場聯賽全部正選上陣(入3球)，係球隊前線嘅核心人物，消息指般尼領隊戴治對今次轉會非常憤怒，因為球會完全冇預期過會出現呢個情況，亦冇任何後補前鋒計劃，嚴重影響下半季嘅護級任務。