阿仙奴重金撬華荷域　奧巴美揚貼相表心迹？

最強博彩盤路過關神器《串績王》：http://win.on.cc/football/　

英國多間傳媒報道，阿仙奴正全力斟介費倫天拿前鋒杜辛華荷域加盟，據報收購計劃總開支高達1.5億鎊，證明「兵工廠」決心十足，不過早前被罷去隊長職務嘅奧巴美揚，日前突然自貼阿仙奴波衫相，似乎係向領隊阿迪達表示留隊心意。

據《The Athletic》等媒體消息，阿仙奴開價5,800萬鎊收購杜辛華荷域，費倫天拿已經接納，不過呢位塞爾維亞前鋒目前未作決定，消息指阿仙奴為說服佢加盟，將開出30萬鎊周薪合約，同時接納佢經理人嘅巨額佣金要求，報道指轉會費加佣金及整份合約薪酬，總開支達1.5億鎊。

因紀律問題被除去隊長職務嘅奧巴美揚，已經超過1個月未為阿仙奴上陣，不過正為加蓬踢非國盃嘅佢，日前突然喺twitter自貼著住阿仙奴波衫嘅相片，係佢被雪藏後首次著阿仙奴球衣露面，呢位前鋒同球會仲有1年半合約，似乎仍然希望再次得到領隊阿迪達嘅信任。