傳愛華頓決定炒肥賓　朗尼準備接手

最強博彩盤路過關神器《串績王》：http://win.on.cc/football/　

愛華頓喺周六(15日)英超作客1比2輸畀諾域治，英國傳媒廣泛報道，球會已經決定將領隊賓尼迪斯解僱，依家只係傾緊賠償金問題。據報鄧肯費格遜會再次出任看守領隊，不過愛華頓就希望前青訓巨星、現任打比郡領隊朗尼可以回巢領軍。

愛華頓輸畀諾域治後，近13場聯賽只係贏過1場，依家只係距離降班區6分，球會高層已忍無可忍，賽後即刻召開高層會議，並且決定將賓尼迪斯炒魷。喺2019年曾經出任看守領隊嘅鄧肯費格遜，預料會再一次暫時代替領軍。

英國《太陽報》爆料，愛華頓新帥人選鎖定朗尼，呢位英格蘭傳奇前鋒今季帶領打比郡表現優異，雖然球隊因財政問題被扣21分，但佢帶住呢支「拉雜成軍」嘅球隊喺近5場英冠4勝1和，依家排尾2仍然有護級希望，朗尼嘅領軍能力得到一致肯定。