馬迪爾高調反擊蘭歷克：我冇罷踢！

最強博彩盤路過關神器《串績王》：http://win.on.cc/football/　

曼聯內亂情況再次成為焦點，周日(16日)作客阿士東維拉被逼和2比2後，領隊蘭歷克公開指安東尼馬迪爾「罷踢」，所有冇進入大軍名單，不過呢位法國前鋒隨即反擊，喺個人IG表明從來冇拒絕比賽，亦永遠唔會罷踢，直接向蘭歷克宣戰！

對於蘭歷克嘅罷踢指控，26歲嘅安東尼馬迪爾就拒絕「食死貓」，喺自己IG Story留言澄清：「我永遠唔會拒絕為曼聯比賽，我喺呢度(曼聯)效力咗7年，從來唔會、亦永遠唔會對球會以及球迷有任何不敬。」

自從安東尼馬迪爾上個月向蘭歷克要求1月被外借後，一直都冇出現喺曼聯大軍名單，今場對維拉球隊只有8個後備(英超可以有9名後備)，當中仲有2個係龍門，蘭歷克賽後就話本來預安東尼馬迪爾入圍，但對方拒絕參與。