又傷一個！利物浦炒賓福特代價唔細

最強博彩盤路過關神器《串績王》：http://win.on.cc/football/　

利物浦周日(16日)英超主場3比0大勝賓福特，證明就算穆罕默德沙拿同沙迪奧文尼唔喺度，「紅軍」嘅兵力一樣可以踢出強大威力，可惜佢哋今場亦付出代價，阿歷士張伯倫比賽期間足踝受傷，見到被換走嗰陣神情痛苦，預料將會休養一段時間。

穆罕默德沙拿同沙迪奧文尼離隊踢非國盃下，利物浦今場用羅拔圖法明奴、迪亞高祖達同阿歷士張伯倫組成三叉戟，44分鐘憑角球由法賓奴頂入先開紀錄，69分鐘安德魯羅拔臣傳中，阿歷士張伯倫頭槌頂入，不過佢入波後5分鐘自己扭傷左踝，而且表現得非常失望同痛苦，似乎傷勢唔簡單。入替佢嘅南野拓實喺77分鐘埋齋，協助利物浦大勝3比0完場。

利物浦領隊高普賽後表示：「張伯倫踢得好好，但呢次受傷係場波一大陰影，我哋要等星期一(17日)先做更詳細檢測，依家乜都唔知，希望最後冇乜大礙。」阿歷士張伯倫受傷，意味今仗27歲生日嘅南野拓實，嚟緊好大機會有得正選上陣。