車路士4場不勝爭標渺茫　盧卡古又爆爭執

最強博彩盤路過關神器《串績王》：http://win.on.cc/football/　

車路士頹勢持續！周三(19日)凌晨英超賽事，車路士作客被白禮頓逼和1比1，近4輪聯賽3和1負未贏過，依家落後榜首曼城12分兼踢多1場，爭標機會變得相當渺茫。車路士王牌前鋒盧卡古狀態差勁，半場期間更同隊友薛耶治爭執，賽後再成箭靶。

車路士今場稍佔上風，但面對白禮頓緊密防守，箭頭盧卡古上半場只係掂過8次波，形同虛設，28分鐘車仔仍然由薛耶治禁區外放冷箭射入，半場領先1比0，但半球員返更衣室途中，盧卡古就對薛耶治嘅傳送非常不滿，兩人一邊離場一邊爭執，薛耶治用手掩口同盧卡古理論，盧卡古就激動咁指手畫腳表達不滿。

換邊後車路士演出未見起色，白禮頓更喺60分鐘藉角球攻勢由阿當韋斯達頂入追平，兩隊之後互無紀錄，盧卡古亦喺80分鐘被調離場，最終1比1握手言和。對於盧卡古同薛耶治爭執，杜曹賽後表示：「佢哋唔開心係好正常，佢哋希望大家踢得更好都係好正常，球隊依家出現疲態，唯一解決方法就係畀球員一啲休息時間。」