【官宣】唔夠兵照散貨？哥拉辛拿斯投馬賽

足球博彩神器，每日重心提供盡在《彩報》：http://win.on.cc/football/　

阿仙奴上星期因為唔夠13個球員比賽，對熱刺嘅英超賽事成功延期，不過另邊廂就繼續「瘦身」，球會周三(19日)宣布同哥拉辛拿斯提前解約，呢位波斯尼亞國腳亦即時簽約法甲勁旅馬賽。

哥拉辛拿斯喺2017年以自由身加盟阿仙奴，周薪超過10萬鎊，但佢近年已長坐冷板，成為球隊其中一個高薪冗員，雖然佢同阿仙奴仲有半年合約，不過隨住馬賽出手斟介，雙方已決定提前半年解約，令佢可以自由身轉會。

阿仙奴除咗放走哥拉辛拿斯之外，據報中堅柏保馬里亦即將外借去意甲烏甸尼斯，加上今個月將中場美蘭尼爾斯、前鋒巴洛根兩位小將外借，「一邊唔夠人踢、一邊放走球員」做法引起非議，熱刺領隊干地日前被問到上場聯賽延期，呢位意大利名帥都抽水話：「我咁大個仔第1次聽到有比賽因為傷兵太多而要延期。」