C朗被換大發脾氣 蘭歷克:唔使佢攬我!

2022年01月20日 09:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯喺英超作客3比1擊敗賓福特,復出嘅C朗拿度雖然冇波入,但賽後仍然成為話題人物,事關佢喺70分鐘被換走嗰陣大發脾氣,掟衫、口噏噏兼拒坐後備席,要蘭歷克同佢「訓話」先至冷靜落嚟,蘭歷克賽後話調動係戰術需要,唔會要求C朗攬佢。
比賽去到70分鐘,曼聯已經領先2比0嘅時候,蘭歷克用哈利馬古尼同拉舒福特入替C朗同格連活特,C朗對呢次換人非常不滿,蘭歷克見到亦第一時間攬一攬佢,但C朗就全無反應,呢位葡萄牙球星不斷擰頭兼唸唸有詞,又將教練拎畀佢件風褸掟落地下,最後仲有凳唔坐而選擇坐喺側邊梯級,最終蘭歷克再次走去同佢「咬耳仔」,C朗嘅情緒先至冷靜番。
蘭歷克賽後透露:「C朗問『點解係我?點解要換走我?』我話呢個決定係為球隊利益,5日前我哋對維拉有同樣情況,領先2球下喺最後15分鐘被追和,我唔想再犯同樣錯誤,所以換入哈利馬古尼同加多個快速前鋒,我覺得呢個係正確決定。」
對於C朗嘅情緒,蘭歷克就表示諒解:「我明白C朗想入波,或者幾年之後佢做教練,會明白我呢個決定,我唔會預期佢(被換出後)攬我,一個射手當然希望留喺場上爭取入波,我對C朗完全冇意見,佢只係啱啱傷愈,球隊又有拉舒福特、安東尼馬迪爾呢啲後備,我點解唔物盡其用?」