曼聯要賣哈利馬古尼 史譚:佢渣過布朗!

2022年01月21日 18:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯領隊蘭歷克上任後密謀大改革,據報隊長哈利馬古尼竟然都係被清洗目標,呢位8,000萬鎊中堅最近2場聯賽都淪為後備,喺蘭歷克心目中嘅重要性明顯唔大。曼聯名宿史譚近日亦公開批評哈利馬古尼,話佢表現「衰過布朗」。
英國《每日星報》報道,蘭歷克審閱曼聯陣容後,認為哈利馬古尼、雲比沙卡同勞基梳爾3位後防,水平都唔符合要求,將會被曼聯清洗,當中以哈利馬古尼「上榜」最令人驚訝,呢位英格蘭國腳2019年加盟後,第1季38場聯賽全部正選,上季亦只係喺受傷或休息先至缺陣,但最近佢連續2仗喺健康情況下淪為後備,睇住華拉尼同域陀連迪路夫合組中堅拍擋。
事實上,哈利馬古尼今季狀態麻麻,季初唔少失球都同佢有關,曼聯傳奇中堅史譚日前表示,哈利馬古尼實力連佢當年拍擋布朗都不如:「曼聯用好多錢買馬古尼,老實講佢踢李斯特城嗰陣幾好,不過我覺得布朗嘅速度比佢更高,1對1嘅防守亦更靈活,效力曼聯嘅話呢兩項元素好重要。」