干地第一簽係佢　熱刺斟掂「大隻狼人」

最強博彩盤路過關神器《串績王》：http://win.on.cc/football/　

根據《天空體育》爆料，熱刺已經同狼隊達成協議，將以「先借後買」方式簽入狼隊翼鋒艾達馬查奧爾，成為干地執教熱刺之後，首位簽入嘅球員。

據悉，熱刺同狼隊雙方管理層近期一直就艾達馬查奧爾轉會問題展開談判，初時熱刺出價1,500萬鎊轉會費，但被狼隊拒絕，其後加碼至2,000萬鎊，終於達成協議。熱刺將於今個月借用艾達馬查奧爾，為期半年，等到夏天必須以2,000萬鎊買斷呢位26歲西班牙國腳。

由於艾達馬查奧爾只剩下18個月合約，而且無意續約，所以狼隊決定出售佢。

以大隻身形見稱嘅艾達馬查奧爾速度快、爆炸力強，但係入球能力欠佳，今季為狼隊上陣22次僅入1球。早前有傳熱刺主帥干地要求增兵，如果會方唔答應佢要求，就可能會辭職，熱刺依家簽入艾達馬查奧爾，唔知干地滿唔滿意呢？