車路士18日內3殺熱刺　破干地英超不敗身

最強博彩盤路過關神器《串績王》：http://win.on.cc/football/　

周一(24日)凌晨英超「倫敦打吡」，車路士繼英聯盃4強「雙殺」熱刺後，再喺主場贏2比0打破干地執教熱刺後聯賽不敗身，18日內第3度「拔刺」。車路士贏波後有47分，同榜首曼城差距拉近到10分，仍然保持一絲爭標希望。

車路士今場佔盡上風，甫開波就發動連串攻勢，可惜未能轉化為入球，直到47分鐘薛耶治禁區頂妙射，熱刺門將洛里斯目送個波彎入死角。車路士領先後未有收手，55分鐘美臣蒙特左路開出罰球，堤亞高施華頭槌頂入，協助車路士贏2比0完場。

前車路士領隊干地18日內3次倒戈都輸波，呢位意大利名帥賽後再次發表「級數論」，指熱刺要好多年時間先會追到車路士：「熱刺依家同頂尖球隊有好大差距，1個轉會窗唔足以扭轉情況，過去5年個差距愈嚟愈大，要短時間修理係唔現實，可能要好多年嘅時間，可以肯定嘅係依家要開始(重建)。」