阿仙奴悶和般尼 連續4場食白果

2022年01月24日 10:00
東網電視
更多新聞短片
最強博彩盤路過關神器《串績王》:http://win.on.cc/football/ 
阿仙奴爭逐英超前4遇上重大挫折,佢哋周日(24日)主場迎戰包尾嘅般尼,全場唯攻之下再次忘戴射門鞋,最終只能夠0比0打成平手,亦係「兵工廠」連續第4場比賽冇波入,係球隊自2005年12月以來首次連續4仗「食白果」。
阿仙奴今場繼續殘陣出戰,後備席要用5個從未喺英超上陣嘅U23球員填補,面對主守嘅般尼束手無策,般尼門將尼克普比亦有神勇演出,令阿仙奴全場21次攻門都把握唔到,0比0悶和收場。阿仙奴踏入2022年後仲未贏過,各項賽事5場2和3負,而且連續4場入唔到波。
英超踢埋今輪進入休戰期,據報阿仙奴將拉隊去杜拜集訓,領隊阿迪達賽後透露球隊會盡力簽新球員加盟:「我哋好努力咁嘗試緊(買球員),呢個一直係球會嘅計劃,但呢個轉會市場充滿困難,我唔肯定可唔可以成功。」消息指阿仙奴正商討借用祖雲達斯中場艾法美路,另外會全力斟介費倫天拿前鋒杜辛華荷域。