寸王最新金句：贏太多驚場波冇人睇

最強博彩盤路過關神器《串績王》：http://win.on.cc/football/　

羅馬周一凌晨意甲贏安玻里4比2，其實佢哋上半場已經贏到4比0，穩操勝券，下半場被連追兩球，令賽事出現驚險場面。賽後「寸王」摩連奴竟然咁講：「我哋唔再攻入5比0，係要保住收視率，如果真係贏到5比0，可能冇人再睇呢場波。」

羅馬今仗上半場領先4球，譚美阿巴謙起孖，來自波圖嘅新援借將沙治奧奧利華拉亦連續兩場意甲有「士哥」，摩連奴對呢位葡萄牙中場有讚冇彈：「佢真係好出色，雖然喺純技術層面唔係最頂級，但總能夠幫到球隊，而且習慣效力爭冠球隊，心態上亦比隊友優勝。」

至於「譚仔」起孖後，喺意甲累積攻入10球，達到入球雙位數，當中所有賽事近7仗轟入7球，近況大爆發，證明摩帥季初重金4000萬歐元簽佢係物有所值，呢位英格蘭前鋒表示：「當初摩連奴問我，要喺英格蘭淋雨，定想嚟羅馬曬太陽，我揀咗曬太陽，因為摩連奴，我先加盟羅馬。」