阿根廷冇美斯照贏　踢智利落深淵

最強博彩盤路過關神器《串績王》：http://win.on.cc/football/　

周五(28日)早上世界盃外圍賽南美洲區賽事，阿根廷即使缺少球王美斯，仍然憑迪馬利亞、拿達路馬天尼斯各入1球，作客以2比1擊敗智利。智利輸波之後，已經落後第4位烏拉圭3分，餘下3輪比賽，想以前4位取得直接出線資格非常困難。

阿根廷已提早取得出線資格，所以領隊史卡朗尼並冇徵召早前確診新冠肺炎嘅美斯，但今場對智利，仍然夠殺，開波9分鐘，迪馬利亞射入世界波，為阿根廷打開紀錄。

踢到20分鐘，智利由前鋒比尼頓頂入扳平1比1，但佢哋只係開心咗14分鐘又失守，迪保羅遠射被智利門將哥迪奧巴禾擋出，拿達路馬天尼斯第一時間上前補射入網，為阿根廷領先2比1，其後哥迪奧巴禾更因傷退下火線，令智利雪上加霜。

阿根廷贏波之後，繼續排第2位，落後榜首巴西4分。智利餘下3輪外圍賽，將作客高原球隊玻利維亞，以及鬥巴西、烏拉圭，隨時再失分。