利物浦截劫熱刺　5,000萬鎊簽南美神鋒！

足球博彩神器，每日重心提供盡在《彩報》：http://win.on.cc/football/　

冬季轉會市場最後衝刺戰況激烈，唔少球會都為爭奪心儀球員過招，利物浦最近就成功「攔途截劫」，派出團隊飛去阿根廷，成功搶走原本答應加盟熱刺嘅哥倫比亞翼鋒路爾斯戴亞斯，轉會費總值達5,000萬鎊。據報路爾斯戴亞斯加盟，意味塞內加爾前鋒沙迪奧文尼將會離開利物浦。

25歲嘅路爾斯戴亞斯依家正為哥倫比亞出戰世盃外，周二(2日)朝早就會作客阿根廷，呢位波圖球星原本已同意加盟熱刺，不過利物浦突然加入戰團，並且派出團隊飛去阿根廷親自游說，最終路爾斯戴亞斯選擇「紅軍」，並立即喺阿根廷做體測。

利物浦今次出招快而準，據報轉會費為3,750萬鎊，另外再加1,250萬鎊浮動獎金條款，轉會費總值達5,000萬鎊。路爾斯戴亞斯喺上年美洲國家盃同美斯並列神射手，有傳佢嘅加盟係會取代沙迪奧文尼，該塞內加爾球星同利物浦合約只剩18個月，可能會喺今個夏天被賣走。