蘇斯克查重返曼聯　撐愛女入決賽

最強博彩盤路過關神器《串績王》：http://win.on.cc/football/　

蘇斯克查去年11月被辭退後，佢同曼聯嘅關係仍然緊密，因為佢女兒Karna效力曼聯女足青年隊，已經加盟接近3年，日前曼聯女足U21喺英超女足青年賽殺入決賽，Karna入波，蘇斯克查都有現身撐場。

Karna同老竇一樣司職前鋒，連個樣都成個餅印，佢喺2019年蘇斯克查轉正上任後，就隨同老竇加入曼聯，成為曼聯女足青年軍，因為父親關係，Karna被視為曼聯女足主力人選。

蘇斯克查今次重返曼聯，係觀看曼聯女足青年隊對阿士東維拉女足青年隊賽事，結果曼聯女足大勝5比0，Karna取得入球，決賽對手係伯明翰女足青年隊。曼聯女足青年隊主帥希莉表示：「Karna無論控球定無球狀態，表現都非常出色。」

更有球迷表示，蘇斯克查可考慮執教曼聯女足青年隊，咁樣佢就可以親自指導女兒。