文尼1傳1射　塞內加爾率先入非國盃決賽

最強博彩盤路過關神器《串績王》：http://win.on.cc/football/　

周四(3日)凌晨舉行嘅非國盃4強，塞內加爾以3比1擊敗布基納法索，連續2屆打入決賽。塞內加爾球星沙迪奧文尼今場射入1球及1次助攻，表現光芒四射，誓要捧盃彌補上屆屈居亞軍嘅遺憾。

開波初段，沙迪奧文尼個人突破之後起腳，可惜被布基納法索門將高菲救到，跟住塞內加爾仲有1次入波良機，但迪安頭槌攻門斜出。

踢到31分鐘出現爭議性一幕，布基納法索門將高菲出迎撞跌高耶迪，初時球證吹罰12碼，但睇完VAR後取消判決，塞內加爾又錯失1次入波機會。

直至70分鐘，塞內加爾終於打開紀錄，效力巴黎聖日耳門嘅中堅艾度迪亞路把握1次角球攻勢射入。僅過6分鐘，沙迪奧文尼前場搶到波，傳畀伊祖沙古爾射成2比0，值得一提呢位中場都係效力巴黎聖日耳門。

雖然82分鐘布基納法索入番1球，追至1比2，但佢哋喺臨完場前犯錯，沙迪奧文尼單刀射成3比1，呢位利物浦前鋒當選今場最佳球員，塞內加爾將會同另一場4強喀麥隆對埃及嘅勝方爭奪冠軍。