阿歷山大米祖域入33球　創英冠入球紀錄

足球博彩神器，每日重心提供盡在《彩報》：http://win.on.cc/football/

周四（24日）英冠賽事，富咸憑阿歷山大米祖域梅開二度，2比1擊敗彼德堡。除咗富咸繼續高踞榜首之外，米祖域今場仲刷新咗呢項賽事，自2004年創立以來嘅最高入球數字紀錄。

賽前已經排喺榜首嘅富咸，領先第2位嘅般尼茅夫6分，正向住取得來季英超資格邁進。27歲塞爾維亞射手阿歷山大米祖域，今場繼續領銜鋒線，先喺28分鐘憑一記12碼入球，打破賓福特前鋒艾雲東尼上季創下嘅31球紀錄；其後喺62分鐘窩利射入個人今季第33個聯賽入球，將最高入球數字進一步推高。富咸贏波後，目前已拋離第2位達9分，但打多兩場，不過米祖域腳風咁順，富咸提早升超或者只係時間嘅問題。