車路士收首個開價　英超總裁：10日內搞掂

足球博彩神器，每日重心提供盡在《彩報》：http://win.on.cc/football/　

車路士班主阿布拉莫域周四(3日)宣布賣盤，事情快速進展，英國傳媒報道有歐美財團已聯手出擊，不過開價遠低於阿布拉莫域要求嘅30億鎊，最終有可能「割價」以20億鎊成交。英超行政總裁馬斯達斯亦表示，車路士賣盤有機會喺10日內閃電完成，英國《每日鏡報》更指最快下周一(7日)落實！

英國《太陽報》、《每日郵報》等報道，瑞士富商韋斯同美國商人Todd Boehly已聯手組成財團進行收購，周五(4日)會提交首次開價，消息指報價大約係20億鎊，遠低於阿布拉莫域要求嘅30億鎊。由於英國政府隨時會凍結阿布拉莫域嘅英國資產，加上其他潛在買家仍按兵不動，令韋斯同Todd Boehly有信心可以用較低價錢完成收購。

英國《每日鏡報》進一步指出，韋斯同Todd Boehly將會喺今個周末同車路士加速斟介，有信心可以迅速達成協議，樂觀預計最快周一正式公布車路士易主。最早爆出韋斯準備收購車路士嘅瑞士媒體《Blick》，指韋斯周四(3日)由波士頓飛去Todd Boehly身處嘅加州，就係為今次行動決定性一擊「拍板」。

關於車路士賣盤，英超行政總裁馬斯達斯公開表示「歡迎」，認為阿布拉莫域作出正確決定：「呢件事過去7日發展極快，阿布都知道呢個環境好難繼續落去，所以做出恰當嘅決定。今次賣盤可以好快完成，之前英超最快完成嘅賣盤程序係10日，呢個紀錄係有機會被打破。」