拉奧拿搭路　格雲貝治有望轉投拜仁

最強博彩盤路過關神器《串績王》：http://win.on.cc/football/　

球星搖籃阿積士又有新星爆出，19歲中場賴恩格雲貝治近2季成功上位，據報已獲德甲班霸拜仁慕尼黑垂青，消息指雙方已經展開斟介，而賴恩格雲貝治近日更表示，想會令一手栽培佢嘅阿積士血本無歸，今個夏天轉會勢在必行。

賴恩格雲貝治16歲已經為阿積士踢荷甲，上季開始成為球隊主力，仲入埋荷蘭國家隊，據荷蘭《電訊報》報道，拜仁慕尼黑已對呢位荷蘭國腳展開收購行動，包括同佢位星級經理人拉奧拿進行會面，預計轉會費約2,500萬歐元至3,000萬歐元。由於賴恩格雲貝治同阿積士只剩1年半合約，如果今個夏天唔轉會又唔續約，下年就可以自由轉會。

不過，賴恩格雲貝治日前接受訪問，表明唔想阿積士血本無歸：「我唔知今個夏天係咪轉會，但我肯定唔會喺阿積士一個崩都收唔到之下離隊，我唔可能自由身轉會，呢件事唔會發生。」據報除拜仁慕尼黑之外，皇家馬德里亦對佢好有興趣。