蘭歷克CV成笑柄 前熱刺球星:佢係水貨!

20220308
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
德國名帥蘭歷克上年底接任曼聯領隊,被冠以「戰術大師」之名,杜曹、高普等德國名帥都承認受到蘭歷克嘅戰術思維啟發,令曼聯球迷滿心期待。可惜經過2個幾月領軍,曼聯表現未見改善,反而出現一大堆更衣室問題,據報部份球員竟私下拎蘭歷克張CV嚟笑,而前熱刺球星奧哈拉更直指蘭歷克係「水貨」!
自蘭歷克上任後,曼聯更衣室內矛盾嚴重加劇,英國《曼徹斯特晚報》爆料,部份球員對於蘭歷克用人不公非常不滿,愛將踢得差都場場正選,對其他球員就不屑一顧,好似哈利馬古尼頻頻犯錯都冇受罰,艾歷拜利就長坐冷板,達洛治對自己突然被雲比沙卡搶走正選亦有微言,佢哋私下形容呢班被蘭歷克偏愛嘅球員為「乖寶寶學生」,諷刺佢哋只因聽教聽話就得到重用。除此之外,不滿蘭歷克嘅球員,亦以領隊張「空白」CV嚟嘲笑,指蘭歷克執教生涯只係拎過1次德國盃冠軍。
前熱刺球星奧哈拉近日接受《Talk Sport》訪問,同樣對蘭歷克嘅能力提出質疑:「蘭歷克就係一個水貨,佢嘅能力唔足以執教曼聯,戰術完全冇特別,球隊嘅精神面貌亦都唔好,蘭歷克當然要負責任。」