傷愈不久又整親　占美華迪唞多1個月

足球博彩神器，每日重心提供盡在《彩報》：http://win.on.cc/football/　

早前一度陷入低迷的英超球隊李斯特城，近期走勢回勇，同占美華迪傷愈復出不無關係，可惜呢位「狐狸」頭號射手好唔好彩，上場對列斯聯一戰又再整親膝部，估計最少要再唞多1個月，勢必影響李城戰力。

因大腿後側受傷一度要長唞9周嘅占美華迪，早前喺作客對般尼嘅聯賽中復出，仲即刻斬獲入波，幫助球隊以2比0擊敗對手，擺脫5場聯賽不勝嘅頹勢。不過好景不常，上場面對列斯聯再擔正嘅占美華迪，就喺下半場因傷被調離場，賽後證實因膝傷要再唞多1個月，就連領隊羅渣士，都話戥佢唔抵，認為呢位球隊功勳老將好唔好彩。

雖然今季受傷患困擾，但現年35歲嘅占美華迪，聯賽至今攻入10球，依然係李城陣中不可或缺嘅頭號射手。下場將於歐協聯16強面對法甲雷恩嘅「狐狸」，近期走勢啱啱有啲起色，又痛失進攻核心，隨時再打亂領隊羅渣士嘅如意算盤。