葡萄牙真王牌　迪亞高祖達重要過C朗？

足球博彩神器，每日重心提供盡在《彩報》：http://win.on.cc/football/　

葡萄牙距離2022世界盃決賽周只差1步，C朗拿度嘅表現當然舉足輕重，不過依家嘅葡萄牙已經唔再係C朗嘅「一人球隊」，利物浦前鋒迪亞高祖達今季表現，已經證明佢對球隊重要性，唔會少得過C朗拿度！

要數今季葡萄牙最弗球員，迪亞高祖達當之無愧，佢今季球會各項賽事已入19球，壓倒18球嘅C朗成為5大聯賽入波最多嘅葡萄牙球員。另外，葡萄牙今屆世盃外射手榜，C朗以6球排第1位，迪亞高祖達5球僅隨其後，但C朗踢8場6球當中，有4球嚟自魚腩盧森堡，相反迪亞高祖達踢6場入5球，有對塞爾維亞嘅2個入波，以及上仗對土耳其嘅關鍵入球。

葡萄牙國家隊有唔少曼城同曼聯球員，迪亞高祖達表明「球會死敵」唔會影響國家隊合作：「我哋經常都會討論英超嘅敵對形勢，不過當比賽嚟到，我哋會同其他球員一樣全力應戰。」葡萄牙上場淘汰土耳其後，般奴費南迪斯就曾喺社交網大讚迪亞高祖達「永冇甩拖」。