卡塔爾世界盃抽籤　等睇「死亡之組」誕生！

東網電視

足球博彩神器，每日重心提供盡在《彩報》：http://win.on.cc/football/　

2022卡塔爾世界盃決賽周抽籤周六(2日)凌晨零時舉行，32隊將分成8組，每組4隊，8支種子隊列入第1檔次，包括主辦國卡塔爾、巴西、比利時、法國、阿根廷、英格蘭、西班牙，葡萄牙。第2檔次有德國、荷蘭，第3檔次有非國盃冠軍塞內加爾，隨時出現「死亡之組」！

國際足協喺世盃分組賽抽籤前，公布最新一期世界排名，比利時雄霸「1哥」位置3年半後終於讓位，由巴西重奪世界第1位置。隨住世界排名公布，世盃分組賽抽籤檔次亦全部落實，美國成功保住第2檔位置。

巴西喺近2場世盃外分別大勝智利同玻利維亞4比0，成功重登「1哥」寶座，比利時就跌落次席，第3位至第8位就冇變動，順序係法國、阿根廷、英格蘭、意大利、西班牙同葡萄牙，除咗意大利位置由卡塔爾取代，呢8隊就係世盃抽籤分檔嘅種子隊。

落實嘅世盃分組賽抽籤檔次同原先預計一樣，喺中北美洲區首名出線嘅加拿大，原本希望可以排第3檔，但最新排名不升反跌，由第33位跌落第38位，輸畀突尼西亞同喀麥隆，只能夠排第4檔，至於墨西哥(第9位)同美國(第15位)就保住第2檔位置。

根據規則，同一檔次球隊唔會抽入同組，除咗歐洲球隊之外，其他同一洲份球隊，唔會抽入同組，所以可能出現巴西、德國、塞內加爾、加拿大最恐怖「死亡之組」。卡塔爾世界盃將於今年11月21日揭幕，共進行64場賽事，12月18日上演決賽。

落實世盃抽籤分檔

第1檔次：卡塔爾(51)、巴西(1)、比利時(2)、法國(3)、阿根廷(4)、英格蘭(5)、西班牙(7)、葡萄牙(8)

第2檔次：墨西哥(9)、荷蘭(10)、丹麥(11)、德國(12)、烏拉圭(13)、瑞士(14)、美國(15)、克羅地亞(16)

第3檔次：塞內加爾(20)、伊朗(21)、日本(23)、摩洛哥(24)、塞爾維亞(25)、波蘭(26)、南韓(29)、突尼西亞(35)

第4檔次：喀麥隆(37)、加拿大(38)、厄瓜多爾(46)、沙地阿拉伯(49)、加納(60)、3支附加賽勝出球隊

( )內為最新世界排名

on.cc東網