夏蘭特二度拒絕曼聯　原因路人皆知

最強博彩盤路過關神器《串績王》：http://win.on.cc/football/　

挪威前鋒艾寧夏蘭特今夏離開多蒙特，歐洲各豪門任佢揀，不過曼聯喺呢場轉會爭奪戰已經出局，因為夏蘭特已經拒絕加盟曼聯，原因係「紅魔鬼」已經5年冇捧盃，亦缺乏大賽爭冠能力。

夏蘭特同前曼聯領隊蘇斯克查有深厚淵源，出道初期效力莫迪期間兩人有師徒關係，後來夏蘭特喺薩爾斯堡冒起，當時執教曼聯嘅蘇斯克查於2020年力邀佢過檔，不過夏蘭特拒絕咗，並決定加盟多蒙特。

兩年後嘅今日，夏蘭特同多蒙特協議嘅7500萬歐元解約金啟動，歐洲各豪門只要肯支付上述金額，就有機會簽入該前鋒，論財力曼聯絕對冇問題，但爭標能力就同各支競爭球隊相差甚遠。

夏蘭特爭奪戰至今，曼聯一直機會不大，近日傳出消息，曼聯已被夏蘭特拒絕，理由路人皆知，亦係夏蘭特第二度拒絕紅魔鬼。至於現時爭奪夏蘭特嘅球會，就有曼城、皇馬同拜仁。