阿仙奴夏天要簽7人　同夏薩特經理人密斟　

足球博彩神器，每日重心提供盡在《彩報》：http://win.on.cc/football/　

阿仙奴近期傷兵滿營，富安健洋、基蘭泰亞尼同湯馬士柏迪先後重傷，領隊阿迪達亦承認球隊陣容單薄，呢位西班牙籍主帥日前暗示，今夏將會簽入多達7名新兵，據報「兵工廠」其中一個目標係皇家馬德里中場夏薩特，並且已經秘密進行接觸。

阿迪達近日講到下季組軍方向，明確表示需要大量球員：「如果財政上許可，我希望球隊有22個外場球員加3個門將，好多工作需要做，我預期會有一個忙碌嘅夏天。」阿仙奴目前有18個外場球員，當中拿卡錫迪、尼基迪亞同艾利尼都喺夏天完約，意味阿迪達將要簽入7個球員先可「達成目標」。

阿仙奴要簽嘅球員當中，夏薩特可能係其中之一，據法國媒體《Foot Mercato》爆料，阿仙奴近日同夏薩特經理人進行接觸，有意以先借後買方式引入呢位皇家馬德里球星，31歲嘅夏薩特自從離開車路士後狀態大跌，當然亦想返英超重振雄風。