一個原因　尹佩斯拒絕返曼聯幫手

最強博彩盤路過關神器《串績王》：http://win.on.cc/football/　

早前有傳如果坦哈格成為曼聯新領隊，就會邀請3位曾經效力紅魔鬼嘅荷蘭名宿雲尼斯達萊、尹佩斯、史譚加入教練團，但繼「雲佬」選擇下季擔任燕豪芬主帥之後，尹佩斯亦拒絕重返曼聯，因為佢現時擔任飛燕諾U16青年軍教練，希望繼續親自培訓隊內嘅兒子。

38歲嘅尹佩斯曾於2004至12年效力阿仙奴，但其後戲劇性轉投曼聯，效力紅魔鬼3季上陣105次入58球，奪得1次英超冠軍，據悉坦哈格認為佢熟悉曼聯環境，係擔任助教嘅好人選。

不過，最新消息指尹佩斯並無意離開現時崗位，一來飛燕諾係佢嘅母會，有一份特別感情，最重要係尹佩斯嘅乖仔Shaqueel現時正喺飛燕諾青年軍受訓，佢希望陪住囝囝長大，預料短期內都唔會離開飛燕諾。

因此，一旦坦哈格執教曼聯，副手人選好可能係史譚，呢位一代鐵衞早前曾經透露願意重返曼聯，雙方有望一拍即合。