足球博彩神器，每日重心提供盡在《彩報》：http://win.on.cc/football/　

曼城喺歐聯8強淘汰馬德里體育會，不過付出嘅代價都非常之大，面對對手嘅粗野踢法，菲爾科頓被打爆頭要紮住踢，奇雲迪布尼同基爾獲加亦先後受傷離場，加上後防主將祖奧簡斯路喺比賽尾段食黃牌，4強對皇家馬德里將要停賽，影響巨大。

菲爾科頓、奇雲迪布尼等今場成為馬體會重點「招呼」目標，比賽早段菲爾科頓頂波，菲臘比蒙達里奧從後猛烈撞向佢頭部，令呢位英格蘭小將即場治療3分鐘，最終通過腦震盪測試可以繼續比賽，但個頭就要紮上繃帶。不過奇雲迪布尼同基爾獲加就冇咁好彩，下半場先後被踢傷同撞傷，被逼提早退下火線，周六(16日)對利物浦嘅英足盃4強大戰上陣成疑。

比賽尾段兩隊情緒失控，曼城守將祖奧簡斯路亦沉唔住氣，魯莽犯規拎到黃牌，令佢喺4強首回合對皇家馬德里要坐波監，呢位葡萄牙國腳係曼城防線嘅重要一員，停賽會大大影響球隊嘅部署。