劍指來季錦標　干地望為熱刺引6位新兵

足球博彩神器，每日重心提供盡在《彩報》：http://win.on.cc/football/　

今季有望爭奪歐聯席位嘅熱刺，高踞聯賽前列，但雄心勃勃嘅領隊干地，當然唔會滿足於現況，為咗下季可以進一步挑戰英超等賽事冠軍，呢位意大利教頭似乎已經鎖定多個目標，並將於近日向球會高層提出引援要求，以壯大球隊實力。

據英國傳媒報導，干地近日將會同熱刺班主利維和體育總監柏拉迪斯見面，商談來季組軍安排，並打算向一眾高層提出加大引援力度嘅要求，以增加衝擊聯賽冠軍嘅機會。除咗希望邀請賓福特球星基斯甸艾歷臣重返球會之外，李斯特城中場泰利文斯、托連奴守將基爾臣比爾馬以及諾定咸森林後衞迪積史賓斯等6位球員，都係干地心儀嘅目標。

不過熱刺想買人嘅同時，都要留意避免因本土球員同外籍球員比例失衡，觸犯英超同歐洲足協嘅相關條例。如果干地要喺攻擊線增添外籍兵，熱刺就要作出取捨，意味現時陣中嘅盧卡斯莫拉同貝雲積，都有可能要另謀高就。無論如何，相信今年夏季轉會窗，對柏拉迪斯嚟講都會十分忙碌。