勵志故事　格流後衞變歐霸神射手

最強博彩盤路過關神器《串績王》：http://win.on.cc/football/　

一向只係歐洲賽陪跑份子嘅蘇超球隊格拉斯哥流浪，爆冷打入今屆歐霸盃4強，令人嘖嘖稱奇，球隊可以獲此佳績，隊長達華尼亞居功厥偉，呢位30歲右後衞助攻力極強，今屆歐霸盃已有6球進帳，同里昂前鋒托高伊甘比、波圖前鋒加連奴並列射手榜第1位，由於後兩者所屬球隊已出局，達華尼亞好大機會以後衞身份成為神射手。

達華尼亞出身於紐卡素青訓系統，但佢出道後大部份時間被外借，效力過卡素爾、錫周三、米爾頓凱恩斯、梳士貝利等低組別聯賽球隊，2014年轉投韋根後，都係被投閒置散，直至2015年夏天加盟格拉斯哥流浪，先至獲得重生。

達華尼亞憑出色助攻力，奠定格流正選位置，首季踢蘇超就有10球進帳，上季更轟入12球。呢位「帶刀侍衞」踢歐霸盃一樣有料到，8強次回合對布拉加，個人梅開二度，協助球隊加時勝出晉級。

格拉斯哥流浪將於周五(29日)凌晨歐霸盃4強首回合作客RB萊比錫，達華尼亞隨時可以再數胡。