曼城贏波代價大　再有1位後衞受傷

最強博彩盤路過關神器《串績王》：http://win.on.cc/football/　

曼城喺歐聯4強首回合主場以4比3擊敗皇馬，但亦付出沉重代價，後衞史東斯上半場受傷退下火線，加上基爾獲加養傷，令右閘位置鬧人腳荒。

由於基爾獲加養傷，祖奧簡斯路停賽，曼城主帥哥迪奧拿今場被逼用中堅史東斯客串右閘，但呢位英格蘭國腳踢到36分鐘就傷出，由即將37歲嘅防守中場費蘭甸奴入替，踢右路防守位置，令防線人腳更加殘缺，下半場再失2球。

賽後曼城中堅魯賓戴亞斯承認雖然贏波，但失3球並非好事：「淘汰賽戰局變化多端，任何事情都會出現，但失3球一定唔係好事，多位球員缺陣之下，我哋已經做得唔錯。」

事實上，費蘭甸奴入替之後亦有唔少貢獻，包括右路快放傳中畀菲爾科頓頂入，可見呢位巴西老將仍然有心有力，佢早前已經宣布將於今夏離隊，點都搏埋條老命，希望留下美好回憶。