急需補充前鋒　阿仙奴睇中拿玻里射手

最強博彩盤路過關神器《串績王》：http://win.on.cc/football/　

阿仙奴2位前鋒拿卡錫迪、尼基迪亞好可能今夏自由身離隊，會方近期積極物色射手，繼日前傳出斟介曼城前鋒加比爾捷西斯之後，依家又有新目標，就係拿玻里射手域陀奧森漢。

現年23歲嘅域陀奧森漢2020年夏天以7,000萬歐元轉會費，由里爾加盟拿玻里，成為最高身價非洲球員。呢位尼日利亞國腳今季意甲上陣23場入12球，表現唔錯，引起唔少大球會注意。

《羅馬體育報》爆料指域陀奧森漢想去英超搵食，佢嘅經理人已向拿玻里班主迪羅倫迪斯攤牌，指阿仙奴同曼聯有興趣收購域陀奧森漢，希望球會放人。不過，拿玻里要求8,400萬鎊轉會費，成為交易最大障礙。

據悉，如果拿玻里出售域陀奧森漢，就會簽入維羅納前鋒基奧雲尼施蒙尼，或者薩斯索羅射手施卡馬卡代替佢。