布卡約沙卡挑戰伊恩胡禮神紀錄

足球博彩神器，每日重心提供盡在《彩報》：http://win.on.cc/football/　

阿仙奴今輪作客韋斯咸嘅爭4大戰「6分波」肯定哄動，「兵工廠」新星布卡約沙卡今場更會挑戰一項球會傳奇前鋒伊恩胡禮嘅神紀錄，就係連續3場英超射入12碼，20歲嘅「沙卡仔」上兩場對車路士同曼聯都射入12碼，如果今場再入極刑，就會追平伊恩胡禮嘅紀錄。

伊恩胡禮喺阿仙奴史上入球第2多射手，佢曾於1993至94球季創下連續3場英超射入12碼紀錄，當年對手係奧咸、葉士域治同修咸頓，相隔多年，布卡約沙卡挑戰呢個神紀錄。

呢個紀錄嘅難度在於，首先你要連續3場博到12碼，而個12碼又要交畀你射，仲要射入先得，今場作客韋斯咸無疑係硬仗，但如果「沙卡仔」真係做到，呢個紀錄嘅含金量將會勝過前輩，因為對手係車路士、曼聯、韋斯咸，對手實力強勁。

布卡約沙卡舊年喺歐國盃決賽為英格蘭互射12碼最後一射宴客，令國家隊斷送歐國盃冠軍，佢睇近期處理極刑嘅表現，已經由歐國盃陰影走出，並成長起嚟。