同高普鬥多4年！哥迪奧拿同意續約曼城

最強博彩盤路過關神器《串績王》：http://win.on.cc/football/　

曼城同利物浦近年競爭激烈，2大名帥哥迪奧拿同高普亦惺惺相惜，多次大讚對方嘅施壓令自己不斷進步。隨住高普早前續約利物浦到2026年，英國傳媒指哥迪奧拿亦答應同曼城續約，如果雙方都繼續帶隊，球迷仲可以睇多4年「巔峰對決」。

哥迪奧拿同曼城合約原本喺2023年完結，英國《太陽報》報道，曼城已成功說服哥帥續約至2025年，而且仲有延長合約1年嘅附加條款。消息指哥迪奧拿續約，係球隊收購艾寧夏蘭特計劃嘅關鍵，而簽入艾寧夏蘭特令曼城嘅長遠發展得到保證，亦係哥迪奧拿答應繼續執教嘅原因。

高普早前續約後，哥迪奧拿被問到會唔會跟隨續約，佢當時表示：「唔會呀，老實講我依家只係專注今季最後3個星期比賽，冇時間諗其他嘢。」據報曼城會等到今季完結，先公布哥迪奧拿續約嘅消息。