倫敦打吡!錘仔幫兵工廠大駁火

2022年05月01日 17:01
東網電視
更多新聞短片
最強博彩盤路過關神器《串績王》:http://win.on.cc/football/ 
周日(1日)晚英超尾場上演「倫敦打吡」,由韋斯咸主場火併阿仙奴。「錘仔幫」依家心繫歐霸,而且陷中堅荒,後防定必慌失失;阿仙奴難得連挫勁旅,重奪爭前4主動權,一定搶攻博3分,但近期防守亦唔多穩陣,不妨向2.5球嘅大盤埋手。(Now 621及611周日晚11時30分直播)
韋斯咸走勢持續下滑,近5仗聯賽只得1勝1和3負,而且佢哋依家歐霸大過天,上周中4強首回合主場對德甲法蘭克福,開波49秒就閃電失守,加上欠運下多番中楣中柱,最終輸1比2,但表現其實唔差,相信全隊個心都諗緊周中次回合點樣反敗為勝,主帥莫耶斯今仗隨時派副選應戰唔奇。
「錘仔幫」現時後防天殘地缺,伊沙迪奧普同奧邦拿已經提早收咧,屋漏兼逢夜雨,另一中堅奇治戴臣上仗聯賽不敵車路士0比1之役被逐,今仗要坐波監,就算葛特蘇馬趕及康復,但佢狀態亦係麻麻,加上只得一個正宗中堅,預計「莫天才」會改踢3人防線,等左右閘艾朗加斯威爾同賓莊臣客串,可惜近8仗只得一場冇失波,防守不穩有辦你睇。
阿仙奴防線同欠穩
阿仙奴早前經歷聯賽3連敗後,近兩仗意外連贏勁旅車路士同曼聯,奇兵尼基迪亞同艾利尼發揮出色,協助球隊谷底反彈,趁熱刺接連失分爬番上第4,並且有兩分優勢喺手,餘下賽事只要贏晒就可以重返歐聯舞台,一定搏到盡。
不過喺悍將湯馬士柏迪同基蘭泰亞尼受傷後,令向來穩健嘅阿仙奴防線出現裂縫,近5仗場場有失波,其中4仗開3球或以上,尤其係左閘替工紐奴泰華利斯助攻能力唔曳,但防守就錯漏百出,上仗對曼聯犯手球輸12碼,好彩般奴費南迪斯宴客,唔使成為罪人,見到佢上陣後防就牙煙,寧捧入球大。