利物浦同銀行傾續約　提出加一倍贊助費

最強博彩盤路過關神器《串績王》：http://win.on.cc/football/　

利物浦同球衣心口廣告贊助商渣打銀行嘅合約將於明夏屆滿，英國《每日郵報》指雙方正在傾續約問題，紅軍近年戰績彪炳，趁機提出增加一倍贊助費至每年8,000萬鎊嘅續約條件，如果成事，就會成為史上最貴球衣心口廣告贊助費。

利物浦現時同渣打銀行嘅合約由2018/19年球季開始，將於2023年夏天結束，每年贊助費為4,000萬鎊，紅軍近年成績蒸蒸日上，包括奪得2019年歐聯冠軍及2020年英超冠軍，今季又殺入歐聯4強，喺英超僅落後榜首曼城1分，令球衣熱賣，所以同渣打銀行傾續約時，有充分理由要求加碼。

利物浦除咗可能同渣打銀行繼續合作之外，早前亦傳出會方有意物色新贊助商，包括邀請加密貨幣公司合作，開拓球會商業新版圖，預料紅軍「波衫身價」勢必暴漲。