施巴路斯翻生！皇馬準備提出續約

最強博彩盤路過關神器《串績王》：http://win.on.cc/football/　

皇家馬德里拎完西甲冠軍後，再向歐聯冠軍目標進發，「銀河艦隊」嘅佳績係勝在人才鼎盛，最近就連丹尼施巴路斯都神奇翻生，頻頻獲得上陣機會，據報皇馬正考慮向佢開出新合約。

丹尼施巴路斯對上2年被外借去阿仙奴，今季原本諗住留隊大展拳腳，點知夏天出戰奧運男足重傷，不過自從踏入2022年後，丹尼施巴路斯重拾狀態，成功打入輪換陣容，今年已經12次為球隊上陣，包括3場歐聯後備入替，上場贏愛斯賓奴嘅「封王戰」更加首次踢足90分鐘。

據西班牙《馬卡報》報道，丹尼施巴路斯同皇馬合約2023年夏天完結，教練安察洛堤滿意佢嘅表現，有望同佢續約，但丹尼施巴路斯要接受自己「輪換」角色，始終皇馬中場仲有莫迪歷、卻奧斯、卡馬雲加同費達歷高華維迪等猛將，要搶正選唔係一件容易嘅事。