曼聯又輸！熱刺勇奪最佳草地獎

最強博彩盤路過關神器《串績王》：http://win.on.cc/football/　

今季再度四大皆空嘅曼聯，以往都係「英超最佳草地獎」常客，奧脫福塊草地畀人讚吓當做心理安慰，但估唔到今季連呢個獎都冇埋，熱刺官網宣布，佢哋獲得本年度「英超最佳草地獎」，更出咗篇千字文大肆宣揚！

熱刺攞草地獎消息一出，幾乎所有人都諗起曼聯，因為呢個最佳草地獎，一路都係網民用嚟恥笑曼聯冇得捧盃用嘅，而今季仲慘，連「草地獎」都冇埋，曼聯今季兩手空空乜都冇作結。

至於熱刺，佢哋咁高興攞到草地獎亦有原因，佢哋新球場新落成啟用，就唔好彩遇上疫情爆發，捱到今季攞番個草地獎都叫做有番個安慰，而球隊正同阿仙奴爭緊英超前4，攞到個草地獎，可能有利刺激士氣，球員會更搏命爭取歐聯資格，希望來季用呢個球場踢歐聯。